190磅行樓梯好辛苦 怪獸爸爸：俾阿仔搭lift返課室

開學在即，「90後教師決戰怪獸家長」版主戴sir近日回到學校處理家長來信，其中一名家長來信稱，兒子體重190磅，課室在6樓行樓梯很辛苦，要求校方允許兒子使用教職員工的升降機。

戴sir致電涉事的家長拒絕要求，並解釋學校只允許有醫生信證明不適宜走樓梯的學生，才能使用升降機，結果被對方怒斥黑暗醜惡，不滿教職員工享有「特權」，更「劉德華」上身稱：

香港係國際大都會，絕不容許咁嘅事發生！

戴sir最後仍然堅決拒絕要求，該名家長最後打去政府熱綫1823投訴，結果當然是不獲受理。

以下為全文：

臨開學前，學校都收到好多無聊信，作為班主任嘅我，8月尾一番到去變左拆信仔，好彩好多都唔關我事。

例如要求音樂堂唔吹牧童笛，因為會變左學生噴口水會，呵，唔關我事，交俾音樂老師；又例如要求體育堂取消棒球課堂，因為小朋友學完都無得係香港玩，呵，唔關我事，交俾體育老師；俾多個例子，要求家政堂老師代學生洗碗，因為家政堂應該係學煮野唔係學洗野，呵，唔關我事，交俾家政老師。
 

以下呢封就關我事 (啲信嘅格式係錯錯地，為左原汁原味我照Copy)：

「致班主任：今年個班房係六樓，我個仔成190磅，日日行樓梯得好辛苦，可唔可以俾佢搭升降機丫？」
 

我本來諗住打個電話去Say No就搞掂，可以覆其他信，點知又搞左我半個鐘。

我：「學校規定升降機只准老師使用，所以怨校方未能答應你要求。」

阿爸：「嗱，學校老師呢就黑暗醜惡嘅！」

我：「唔好意思丫，因為學校得一部升降機，所以校方真係唔能夠俾學生使用。」

阿爸：「你係咪有特權！你係咪大Ｘ晒！」

我：「呢個係資源運用嘅問題。」
 

阿爸：「學校老師除咗黑暗醜惡之外呢，仲好Ｘ識嘆㗎！自己搭Lift就得，其他有需要嘅學生就唔俾用。」

我：「如果有學生整親隻腳，出示番醫生紙，我地學校係會批准佢搭Lift。」

阿爸：「我個仔差唔多成二百磅，仲唔係有呢個需要？」

我：「家長如果出示到醫生紙的話就可以向校方申請，否則校方不作處理。」

阿爸：「你係咪有特權！你係咪斷Ｘ估！香港係國際大都會，絕不容許咁嘅事發生」。

(關國際大都會咩事？)

【後記】

該家長致電1823投訴，但不獲受理。

小編就覺得，如果子女體重190磅，多些走樓梯，更有助身體健康。